3 ماسكات للحصول على شعر صحي .... 3MASKS TO GET HEALTHY HAIR

السلام عليكم ورحمة الله وبركاته

مؤخرا إنطلب مني كثير لماسكات شعر فقلت خل أحطها في تدوينه عشان الكل يستفيد منها 

أنا لمن كنت صغيره كان شعري كثيييير لدرجة إن الربطات تتقطع إذا جيت أربط شعري وم تلف اللفه الثانية إلا بالقوه

وكل مأكبر يتساقط شعري إلين صار حبتين وحتى إلي أقولهم إنه كان كثير م يصدقون

طبعا رحت لدكتور قالي إنو أصلا م عندك مسام كثيره عشان يطلع منها شعر 

وعطاني علاج كثر شعري بس أول م تركت العلاج رجع يتساقط وخف مثل أول 

وطبعا كبرت وأبغا أزبط شعري بالسيراميك والفير والإسبريه وخف شعري أكثر وأكثر 

من جد تعقدت لدرجة هالسنه م أحط شي حار في شعري ألا إذا فيه مناسبه بسسس وصرت أستخدم أشياء طبيعية تساعدني 

ع قد م جربت م عجبني إلا 3 بس وهي إلي رح أقولكم عنها 

والحمدالله الحمدالله تغير شعري كثير

3 ماسكات إثنين منهم داومت عليهم وفادوني كثير والثالثه من كثر م يبغالها طولت بال وصبر وأنا إنسانه عجااازه تركتها بس من جد نتايجها تجنن كلها الثلاثه

نبدأ ...

1) بيض + ملعقة كبيرة زيت زيتون + ملعقة كبيره عسل 

فائدة هالماسك يقوي الشعر يطوله ويكثره ويعطيه لوك الـ Big Sexy Hair

مشكلته الوحيده هي الزيت زيتون يجفف الشعر وأحسه يسحب اللمعه إلي في الشعر رح أقولكم بعد شوي كيف أتصرف مع هالمشكلة 

2) حلبة مطحونه وزيت ذرة ( زيت عافية ) مو مهم المقادير بالضبط بس أهم شي يكون زيت الذره أكثر من الحلبة وحطيها في قزازة وخليها في الشمس 10 أيام كل يوم خضي القزازة ورجعيها في الشمس 

ليش !!

لأننا نبغى الحلبة تتخمر في زيت الذرة ونستفيد من الحلبة بدون لا تطلع ريحتها 

يلا نرجع للماسك الأول وكيف أتصرف مع مشكلة زيت الزيتون

أبدل ملعقة الزيت زيتون بزيت الذره إلي خمرت فيه الحلبة بس بدال م آخذ ملعقة آخذ ملعقنتين

وأراعي لمن آخذ الزيت من القزازة أخلي الحلبة تترسب تحت وآخذ من الزيت إلي فوق بس

عشان قد م أقدر أنو أبتعد من الحلبة المركزه وريحتها 

كذا جمعهنا الماسك الأول والثاني وصار ( بيض + ملعقة عسل + الماسك الثاني )

اللهههههه يعينكم ع الريحه لمصلحتكم إلبسوا كمامات

بس النتايج جمييييييله شعري صار فيه لمعه قوية من زيت الذرة وكثر يعني صار فيه بيبي هير من الحلبة  تقوى شعري من العسل وم تساقط من صفار البيض وطال بسرعه من بياض البيض

يعني كل مكون من هالماسكين إلي خلطناهم له فايده كبيره مره هالماسك يبغاله مدااااومه يعني بعد 3 شهور الشعر بيتغير بنسبة 90% أما الـ10 % الباقيه لسا م وصلت لها 

نجي للآداة إلي بتحطون فيها الماسك هذه هي ...

تلقونها تطلع مع الصبغه حقت الشعر 

أو ممكن بدالها علب الخردل والكاتشب من المحلات إلي يبيعون فيها أدوات المطبخ

فايدة هالآداة إنها توصل الماسك لجذور جذور الشعر وباقي الماسك أمرره ع باقي الشعر

3) الماسك الثالث تجيبون شريحة صبار  تقطعونه من النص تحشون فيه حلبة وتحطونها في خيشة وتحطونها في الشمس وكل ساعتين ترشون عليها مويه عشان تنبت الحلبة في الصبار وإذا جيتوا تستخدمونها تاخذون قطعه تفركونها في جذور الشعر والباقي تخلونه في الخيشة في الشمس 

أخيرا لمن أحط الماسك أجيب النايلون حق الأكل وأغطي فيه شعري عشان مع الكتم المسام تنفتح وبسرعه تتشرب الماسك 

جربت الكابات البلاستيكية م عجبتني حسيتها إستهبال عشان كذا فضلت النايلون أكثر 

وبسسس ..